اسلام میں عورت کا مقام

اسلام میں عورت کا مقام

المرأة في ظلال الإسلام باللغة الأردية

تالیف

ڈاکٹر عبدالرحمن بن عبد الکریم الشیحہ

مترجم

المركز الأوروبي للدراسات الإسلامية

و نظام الدین یوسف

نظرثانی

وسيم على سيال

www.islamland.com

اسلام میں عورت کا مقام

بسم الله الرحمن الرحيم

الحمد لله والصلاة والسلام على نبينا محمد وعلى آله وصحبه أجمعين وبعد:

اللہ تعالی کا فرمان ہے: ﴿يَاأَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ﴾ ^([1]).

یہ ایک بہت بڑی غلطی ہے کہ اسلام کی طرف وہ باتیں منسوب کی جائیں جن کا اسلام سے کوئی تعلق ہی نہ ہو ، ان ہی باتوں میں سے ایک بات یہ بھی ہے کہ اسلام میں عورت کا کوئی مقام و مرتبہ اور کوئی عزت و احترام نہیں ، اور یہ کہ اسلام نے عورت کے حقوق غصب کیے ہیں ، جبکہ اللہ تعالی کا فرمان ہے: ﴿فَإِنْ كَرِهْتُمُوهُنَّ فَعَسَى أَنْ تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا ﴾ ^([2]).

ترجمہ: گو تم انہیں ناپسند کرو لیکن بہت ممکن ہے کہ تم کسی چیز کو برا جانو اور اللہ تعالیٰ اس میں بہت بھلائی کر دے۔

اسی طرح فرمایا: ﴿وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآيَاتٍ لِقَوْمٍ يَتَفَكَّرُونَ ﴾ ^([3]).

ترجمہ: ور اس کی نشانیوں میں سے ہے کہ تمہاری ہی جنس سے بیویاں پیدا کیں تاکہ تم آرام پاؤ اس نے تمہارے درمیان محبت اور ہمدردی قائم کردی یقیناً غورو فکر کرنے والوں کے لئے اس میں بہت نشانیاں ہیں۔

اس دور میں ہر طرف عورت کے حقوق کے لئے آوازیں بلند ہورہی ہیں ، مرد کے ساتھ مساوات کے مطالبے کیے جارہے ہیں ، ممکن ہے کہ اس طرح کی آوازیں اور مطالبے ان معاشروں میں قابل قبول ہوں ، جن میں عورت کے ساتھ انصاف نہ ہوتا ہو،اسے اس کے حقوق نہ ملتے ہوں ، لیکن ایک ایسے اسلامی معاشرے میں ان حقوق کا مطالبہ کرنا کہ جس میں روز اول سے عورت کو اس کے حقوق اور آزادی اس کے مطالبہ کرنےسے پہلے دیئے گئے ہوں اور ا ن حقوق کو شرعی واجبات میں سے قرار دیا گیا ہوکہ جس پر سمجھوتہ ناممکن ہو، بڑی ہی عجیب بات ہے، ہاں ممکن ہے کہ کوئی شخص انفرادی طور پر عورت کے ساتھ بدسلوکی اور اس کی حق تلفی کرتا ہو ، اگر ایسا ہے تو یہ اسلامی تعلیمات سے روگردانی اور اعراض کا نتیجہ ہے۔

بزعم خود^([4]) جو لوگ عورت کی آزادی اور اس کے حقوق کا مطالبہ کرتے ہیں ، ان کے سارے مطالبات تین محور کے اردگرد گھومتے ہیں :

1. عورت کی آزادی کا مطالبہ۔
2. عورت کی مرد کے ساتھ برابری کا مطالبہ۔
3. عورت کے حقوق کا مطالبہ۔

عورت کی آزادی کا مطالبہ

لفظ آزادی تقاضہ کرتی ہے کہ کوئی چیز مقید ہو جو آزادی کی محتاج ہو، اس لفظ آزادی میں ہی بہت بڑا مغالطہ ہے کہ انسان کو لگتا ہے کہ شاید عورت باندی ہے جسے اس کی غلامی سے آزاد کرانا ضروری ہے۔

آزدی مطلق مفہوم کے ساتھ ایک ناممکن چیز ہے، انسان اپنی طبیعت کے اعتبار سے مقید ہے ، اس لئے کہ اس کی امکانیات اور قدرات محدود ہیں ، چناچہ سب انسان اپنے اپنے معاشروں میں ، چاہے وہ معاشرے ترقی یافتہ ہوں یا ترقی پذیر کچھ قوانین کے تحت زندگی بسر کرتے ہیں ، اپنے معاشی امور چلاتے ہیں ،اور اپنی زندگی کو ان قوانین کے ذریعے منظم کرتے ہیں ، تو کیا اس کا معنی یہ ہوا کہ وہ آزاد نہیں ہیں ؟

معلوم ہوا کہ آزادی کی کوئی حد نہیں اور اگر اس سے تجاوز کیا جائے تو انسان حیوانیت پر اتر آتا ، جو نہ تو کسی سسٹم کو فالو کرتی ہے اور نہ ہی کسی قانون پر عمل کرتی ہے۔

پروفیسر ہنری ماکوو(Ph.D Henry Makow ) ( موصوف مفکر ، امریکی تعلیم کے ماہر ، محقق، اور عورت کے عالمی سطح پر معاملات کے متخصص ہیں ) کہتے ہیں^([5]): عورت کی آزادی یہ نئے انٹرنیشنل سسٹم کا ایک دھوکہ ہے ، ایک بدترین دھوکہ کہ جس نے امریکی عورتوں کو اغوا کیا اور مغربی ثقافت کو تہس نہس کیا۔

یہ حقیقی بات ہے کہ اسلام و ہ پہلادین ہے جس نے عورت کو معاشرے کے ساتھ براہ راست لین دین کرنے کی آزادی دی ،اس سے پہلے عورت اپنی ولی یا وکیل کے ذریعے لین دین کر تی تھی ۔اسلام نے عورت کو صرف بے شرمی اور بے حیائی کے کاموں کی آزادی سے محروم رکھا ہے ،اور اس میں مرد بھی اس کے برابر ہے۔

 اسلام میں حریت کے مفہوم کی تحدید نبی ﷺ کا یہ فرمان کر رہا ہے کہ :" اللہ کی حدود پر قائم رہنے والے اور اس میں گھس جانے والے ( یعنی خلاف کرنے والے ) کی مثال ایسے لوگوں کی سی ہے جنہوں نے ایک کشتی کے سلسلے میں قرعہ ڈالا۔ جس کے نتیجہ میں بعض لوگوں کو کشتی کے اوپر کا حصہ اور بعض کو نیچے کا حصہ ملا۔ پس جو لوگ نیچے والے تھے، انہیں ( دریا سے ) پانی لینے کے لئے اوپر والوں کے اوپر سے گزرنا پڑتا۔ انہوں نے سوچا کہ کیوں نہ ہم اپنے ہی حصہ میں ایک سوراخ کرلیں تاکہ اوپر والوں کو ہم کوئی تکلیف نہ دیں۔ اب اگر اوپر والے بھی نیچے والوں کو من مانی کرنے دیں گے تو کشتی والے سب ہلاک ہوجائیں گے اور اگر اوپر والے نیچے والوں کا ہاتھ پکڑلیں تو یہ خود بھی بچیں گے اور ساری کشتی بھی بچ جائے گی^([6])۔

اسلام میں حریت کا یہی مفہوم ہے کہ شخصی تصرفات شرعی ضوابط کے ساتھ بندھے ہوں جو ایک شخص کو اپنے اور معاشرے کے نقصان سے محفوظ رکھتے ہیں۔

عورت کی آزادی کا مطالبہ کرنے والوں سے پوچھا جائے کہ کونسا نظام عورت کی حرمت کی حفاظت اور معاشرے کو محفوظ رکھنے کے لئے زیادہ فائدہ مند ہے ؟یہ اسلامی نظام کہ جس نے عورت کو مرد کے لئے تکمیل اور اس کا آدھا حصہ قرار دیا ہے یاوہ وضعی نظام اور عالمی قوانین کہ جس کے پیچھے خاص اہداف اور مقاصد ہیں کہ جن کی وجہ سے عزتیں پامال ہوئیں ، محارم کی بے حرمتی کی گئی ، معاشرے منہدم ہوگئے اور ملک اجاڑ دیے گئے؟

عورت کا مرد کے ساتھ مساوات کا مطالبہ

 عورت کا مرد کے ساتھ ہر چیز میں برابری کا مطالبہ ایک ناممکن امر ہے،اس لئے کہ مرد و عورت میں سے ہر ایک کی بناوٹ مختلف ہے چاہے وہ جسمانی ہو یا عقلی یا نفسیاتی۔

 جب ایک ہی جنس ، چاہے وہ مرد ہو یا عورت، میں فرق اور اختلافات کی وجہ سے مساوات ناممکن ہے تو جنس کے مختلف ہونے میں مساوات کا پایا جانا بالاولی مستحیل ہے، اللہ کا فرمان ہے: ﴿وَمِنْ كُلِ شَيءٍ خَلَقْنَا زَوًجَيْنِ لَعَلَّكُمْ َتَذَكَرٌوْنْ﴾ ^([7])۔

ترجمہ: ہر چیز کو ہم نے جوڑا جوڑا پیدا کیا ہے تاکہ تم نصیحت حاصل کرو۔

اللہ تعالی نے جب دونوں جنسوں ،مرد وعورت کو پیدا کیا تو ہر ایک کو ایک مختلف ساخت پر بنایا جو بیک وقت اس کے لئے مکمل ساخت تھی۔

پھر جب ہم انسان کو دو مختلف قسموں میں تقسیم شدہ پاتے ہیں تو ہمیں یہ کہنا پڑے گا کہ یہ تقسیم دو مختلف ذمہ داریوں کو نبھانے کے لئے رکھی گئی ہے ،اس لئے کہ اگر ذمہ داری ایک ہوتی تو جنس بھی ایک ہی ہوتی اور اس کی دو الگ الگ قسمیں نہ ہوتیں۔ چناچہ انسان کا دومختلف جنسوں میں تقسیم ہونا ہی اس بات کی دلیل ہے کہ ہر قسم کی، ذات اور جنس کے اعتبار سے خصوصیت ہے ۔

اسی طرح مثلا: رات اور دن ایک ہی جنس زمانہ کی دو مختلف قسمیں ہیں ،اس تقسیم کا تقاضہ ہے کہ رات کا ایک مقصد ہو او روہ اطمینان اور سکون ہے جبکہ دن کا ایک اور مقصد ہو اور وہ محنت و مشقت ہے ۔

 مرد اور عورت بھی اسی طرح جنس انسان کی دومختلف قسمیں ہیں، چناچہ کچھ چیزوں کا ان دونوں سے بحثیت انسان ہونے کے مطالبہ کیا جاتا ہے ، اور کچھ چیزوں کا صرف مرد سے جبکہ کچھ چیزوں کا صرف عورت سے مطالبہ کیا جاتا ہے ۔ہم کہہ سکتے ہیں کہ مردوعورت ایک جنس کی دو قسمیں ہیں باعتبار جنس ان کی کچھ مشترک ذمہ داریاں ہیں اور باعتبار قسم کے ہر ایک کی مختلف ذمہ داریاں ہیں^([8])۔

مندرجہ بالا باتوں سے واضح ہے مرد وعورت کے درمیان ہر چیز میں مساوات ایک ناممکن امر ہے، اور اس کے لئے کوشش کرنا بھی فضول ہے اس لئے کہ یہ فطرت اور طبیعت کو تبدیل کرنے کی کوشش ہے، اور یہ عورت کی اہانت اور ذلت بھی ہے، کیونکہ اس میں عورت کی اپنی فطرت کے خلاف بغاوت کرتی ہےجس پر اللہ تعالی نے اسے پیدا فرمایا ہے، جس کا معاشرے پر انتہائی برا اثر پڑتا ہے۔

عورت کے حقوق کا مطالبہ

ایسا کوئی بھی قدیم یا جدید قانون یا نظام نہیں ہے جس نے عورت کے حقوق کا تحفظ اور اسے اس طرح اعلی مقام عطا کیا ہو جس طرح اسلام نے اسے عطا کیا ہے ۔چناچہ جیسے ہی رسول اللہ ﷺ کی بعثت سے اسلام کا نور روشن ہوا، اس نے آپ پر ایمان لانے والوں کے نفوس میں ایسا حادثہ بپا کر دیا جو انسانی تاریخ کا سب سے عجیب حادثہ تھا ۔یہ حادثہ ہر اعتبار سے عجیب تھا ،سرعت انتشار میں، شمولیت میں، باریک بینی میں، عام فہم ہونے میں اور بشری فطرت کی موافقت میں۔

اس میں نہ تو کوئی پیچیدگی تھی، نہ التباس تھا ،اور نہ ہی بشری فطرت سلیمہ کے ساتھ اس کا کوئی تصادم تھا۔

آئیے دیکھتے ہیں کہ اس حادثے کے نتیجے میں عورت کی حیثیت اور اس کے حقوق میں کیا تبدیلی آئی جو کہ ہماری بحث کا مقصد بھی ہے۔

 کتاب "تمدن عرب "کے مصنف لکھتے ہیں ^([9]): اسلام کا فضل محض عورت کے مقام کو بلند کرنے تک محدود نہیں بلکہ اس کے ساتھ ہمیں یہ بھی اضافہ کرنا پڑے گا کہ یہ پہلا دین ہے جس نے یہ کیا۔

اسی کتاب میں دوسری جگہ صفحہ نمبر 497 پر لکھتے ہیں : میاں بیوی کے حقوق جنہیں قرآن کریم اور اس کے مفسرین نے بیان کیا ہے وہ یورپین حقوق زوجیت سے کہیں زیادہ بہتر ہیں۔

 عورت کے حقوق کا مطالبہ ان معاشروں سے کرنا چاہیے جنہوں نے اس کے حقوق چھینے ہیں یا ان معاشروں سےکرنا چاہیےجس میں عورت کو اس کے حقوق بغیر کسی ضابطے کے دیئے گئے ہیں ، جن کی وجہ سے عورت ذلت و فساد کی راہ پر چل پڑی ہے ، جن کی وجہ سے عورت محض کھلونا اور شہوت پوری کرنے کا آلہ بن چکی ہے۔

 جہاں تک اسلام کا تعلق ہے تو اسلام نے عورت کے ساتھ انصاف کیا ہے ، اس کے حقوق محفوظ کیے ہیں ، اور اسے ہر عام وخاص حقوق عطا کیے ہیں، جن کے ذریعے سے وہ پرمسرت اور امن و سلامتی والی زندگی بسر کرکے اس ذمہ داری کو اداکر سکتی ہے جس کی وجہ سے اللہ تعالیٰ نے اسے پیدا کیا ہے۔

مختلف ادوار میں عورت کی حالت

دور جاہلیت میں عورت کی حالت

بلاشبہ اسلام سے قبل دور جاہلیت میں عورت ظلم وستم کا نشانہ تھی، اس کے حقوق غصب کیے جاتےتھے، اس کا مال ہڑپ کیا جاتاتھا ،اور اسکی حیثیت ایک سستے سامان کی تھی ،وہ وارث نہیں بن سکتی تھی ،اس لئے کہ میراث صرف اسی کو دی جاتی جو گھڑسواری کر سکتا اور مال غنیمت حاصل کر سکتا تھا ،بلکہ عورت تو خود اپنے شوہر کی وفات کے بعد میراث بن جاتی ،جس طرح دیگر سامان میراث بن جاتا تھا، اور اگر اس کے شوہر کی دوسری بیوی سے اولاد ہوتی تو اس کا بڑا بیٹا دوسروں کی بنسبت اپنے باپ کی بیوی کا زیادہ حقدار ٹھہرتا ،وہ اس کا اسی طرح وارث بنتا جس طرح مال کا وارث ہوتا ہے ،وہ اس کے گھر سے اس وقت تک نہیں نکل سکتی تھی جب تک کہ اپنا فدیہ ادا نہ کردے۔ طلاق کے بعد اسے رجوع کا کوئی حق حاصل نہیں تھا۔ مرد جتنا چاہتا بغیر کسی حد کے شادیاں کرسکتا تھا۔عورت کو اپنا شوہر چننے کا کوئی اختیار نہیں تھا۔ ان کا اپنے شوہروں پر کوئی حق نہیں تھا۔ ایسا کوئی نظام نہیں تھا جو مرد کو عورت پر ظلم کرنے سے روک سکے۔

دور جاہلیت میں عرب لڑکی کی پیدائش پر خوش نہیں ہوتے تھے ، بلکہ وہ اسے منحوس سمجھتے اوراسے بُرائی اور آزمائش خیال کرتے تھے، جب ان میں سے کسی کے ہاں بیٹی پیدا ہوتی تو اسے پریشانی اور غم ڈھانپ لیتے،بیٹیوں کیساتھ نفرت اس حد تک پہنچ چکی تھی کہ وہ انہیں زندہ درگور کر دیتے ،زندہ درگور کرنا قبائل عرب کے ہاں عام تھا ،جس کے خاندان کی اجتماعی حالت کے مختلف ہونے وجہ سے مختلف اسباب تھے، کچھ لوگ بیٹیوں کو عار کے خوف سے زندہ درگور کر دیتے تھے اور کچھ اس میں عیب یابیماری کی وجہ سے اسے زندہ درگور کر دیتے تھے ،اللہ تعالی کا فرمان ہے: ﴿وَإِذَا بُشِّرَ أَحَدُهُمْ بِالْأُنْثَى ظَلَّ وَجْهُهُ مُسْوَدًّا وَهُوَ كَظِيمٌ (58) يَتَوَارَى مِنَ الْقَوْمِ مِنْ سُوءِ مَا بُشِّرَ بِهِ أَيُمْسِكُهُ عَلَى هُونٍ أَمْ يَدُسُّهُ فِي التُّرَابِ أَلَا سَاءَ مَا يَحْكُمُونَ﴾ ^([10])۔

ترجمہ: ان میں سے جب کسی کو لڑکی ہونے کی خبر دی جائے تو اس کا چہرہ سیاہ ہوجاتا ہے اور دل ہی دل میں گھٹنے لگتا ہے۔اس بری خبر کی وجہ سے لوگوں سے چھپا چھپا پھرتا ہے۔ سوچتا ہے کہ کیا اس کو ذلت کے ساتھ لئے ہوئے ہی رہے یا اسے مٹی میں دبا دے، آہ! کیا ہی برے فیصلے کرتے ہیں.

اور کچھ فقر و فاقہ کے ڈر سے زندہ درگور کر دیتے تھے ،یہ عرب کے فقراء تھے، قرآن کریم نے اسے اس طرح بیان کیا ہے: ﴿وَلَا تَقْتُلُوا أَوْلَادَكُمْ خَشْيَةَ إِمْلَاقٍ نَحْنُ نَرْزُقُهُمْ وَإِيَّاكُمْ إِنَّ قَتْلَهُمْ كَانَ خِطْئًا كَبِيرًا﴾^([11])۔

ترجمہ: اور مفلسی کے خوف سے اپنی اولاد کو نہ مار ڈالو، ان کو تم کو ہم ہی روزی دیتے ہیں۔ یقیناً ان کا قتل کرنا کبیرہ گناہ ہے۔

یہاں تک کہ عورت اپنے فطری حقوق سے بھی محروم تھی ،چناچہ کچھ چیزیں مردوں کے لئے خاص تھیں جبکہ عورتوں پر حرام تھیں، اللہ تعالی کا فرمان ہے:﴿وَقَالُوا مَا فِي بُطُونِ هَذِهِ الْأَنْعَامِ خَالِصَةٌ لِذُكُورِنَا وَمُحَرَّمٌ عَلَى أَزْوَاجِنَا﴾^([12])۔

ترجمہ: اور وہ کہتے ہیں کہ جو چیز مویشی کے پیٹ میں ہے وہ خالص ہمارے مردوں کے لئے ہے اور ہماری عورتوں پر حرام ہیں۔

ایسی کوئی چیز نہیں تھی جس پر عورت فخر کر سکتی ہو سوائے اسکے کہ مرد اس کی حفاظت کرتا اور اسکی بے حرمتی اور شرف کی حفاظت کی خاطر بدلہ لیتا تھا۔

قدیم ہندو معاشرے میں عورت کی حالت

"وید "جو کہ ہندوؤں کی ایک مقدس کتاب ہے، جو برہمن دین کی اساسیات پر مشتمل ہے، اس نے عورت کے متعلق لکھا ہے کہ^([13]) :برہمی شریعت مرد اور عورت کے درمیان انسانی قدر و قیمت اور تمام حقوق میں فرق کرتی ہے،بنابریں عورت کو اس کی شہری اہلیت سے مجردکرکے اس کی زندگی کے مختلف مراحل میں اسے مرد کے زیر تسلط دیتی ہے، جیسا کہ مانو قوانین اس پر دلالت کرتے ہیں ،چناچہ اس سے وہ یہ ثابت کرتے ہیں کہ عورت کو اس کی زندگی کے مختلف مراحل میں سے کسی بھی مرحلے میں اپنی چاہت کے مطابق کوئی بھی معاملہ کرنا ،چاہے وہ اس کے گھر کے اندرونی معاملات میں سے کوئی معاملہ ہی کیوں نہ ہو اسے اس کا حق نہیں ہے ۔

بچپن کے مرحلے میں وہ اپنے باپ کے تابع ہوتی اور جوانی کے مرحلے میں اپنے شوہر کے تابع ہوتی ،جب اس کا شوہر فوت ہو جاتا تو اس کی ذمہ داری اس کے چچاؤں کی طرف منتقل ہوجاتی، اگر اس کے چچا نہ ہوتے تو حاکم وقت کی طرف اس کی ذمہ داری منتقل ہوجاتی ،عورت کو اس کی زندگی کے مراحل میں سے کسی بھی مرحلے میں آزادی ،خود مختاری اور تصرف کا کوئی حق نہیں تھا۔ ہندو معاشرے میں عورت کی حیثیت ایک لونڈی کی تھی جس کی کوئی چاہت نہیں تھی، جسے خود کے کسی بھی معاملے پر کوئی اختیار نہیں تھا بلکہ اس کا شوہر اسے جوئے میں ہرا دیتا تھا^([14])۔

وہ اپنے شوہر کی وفات کے بعد شادی نہیں کر سکتی تھی ، بلکہ اسے اپنے شوہر کی وفات کے بعد زندہ رہنے کا بھی کوئی حق نہیں تھا ، اس کے لئے ضروری تھا کہ وہ اپنے شوہر کی وفات کے بعد اسی کی چتا میں جل جائے۔

ان کی دینی کتب کہتی ہیں^([15]): عورت کے لئے بہتر ہے کہ وہ خود کو انہی لکڑیوں پر ڈال دے جو اس کےفوت شدہ شوہر کو جلانے کیلئے رکھی گئی ہوں۔ چناچہ جب اس کے شوہر کی لاش کو لکڑیوں پر رکھ دیا جاتا تو اس کی بیوی نقاب اوڑھے آگے بڑھتی، کاہن اور پنڈت اس کا نقاب اتارتے ،وہ اپنے زیورات اتار کر اپنے رشتے داروں پر تقسیم کرتی ،پھر اپنی مینڈھیاں کھولتی ، اور سب سے بڑا برہمن اس کا ہاتھ پکڑتا اور لکڑیوں کے اردگرد اسے تین چکر لگواتا ،پھر وہ لکڑیوں کو اوپر چڑھ جاتی ،پھر ایک مرد اس کے مردہ شوہر کو اٹھا کر اس کی پیشانی تک لے آتا جو اس عورت کا اپنے شوہر کے لئے عاجزی کا اشارہ ہوتا ،پھر وہ اپنے شوہر پر اپنا دایاں ہاتھ رکھ کر بیٹھ جاتی ،پھر اس کو آگ لگا دیتے اور اسے اس کے شوہر کے ساتھ ہی جلا دیتے۔ ان کی یہ سوچ ہوتی تھی کہ ایسا کرنا اس عورت کو اپنے شوہر کو ساتھ ہمیشہ کی نعمتوں سے ہمکنار کر دے گا، اور وہ اپنے شوہر کے ساتھ پانچویں آسمان میں 35 ملین سال رہے گی ،اور وہ خود کو آگ لگا کر اپنے ننھال ،ددہیال ، سسرال، اور اپنے شوہر کو گناہوں سے پاک کر دے گی ۔اور ایسی عورت کو تمام عورتوں سے بڑھ کر پاکیزہ سب سے زیادہ با عزت اور باکردار تصور کرلیا جاتا ۔یہ عادت ان کے ہاں اتنی عام ہو چکی تھی کہ انہوں نے محض دس سالوں میں 1518 سے 1525 تک تقریبا چھ ہزار(6000) عورتیں جلادیں، اور اس شریعت پر سترہویں صدی تک عمل ہوتا رہا، یہاں تک کہ ہندو مذہب کے دینی عمائدین کی ناپسندیدگی کی بنا پر اسے چھوڑ دیا گیا ۔

اس وقت ہندو عورت جس بدترین حالت میں زندگی بسر کرتی تھی اس کی وجہ وہ باتیں بھی ہیں جو ہندو شریعت میں وارد ہوئی ہیں کہ: تقدیر، طوفان، موت، جہنم ،زہریلے سانپ، ان میں سے کوئی اس قدر خراب نہیں ہے جتنی عورت"^([16])۔

اور بسا اوقات ایک عورت کے بیک وقت کئی شوہر ہوتے اور اس کی حالت مکمل طور پر ایک طوائف کی سی ہوتی^([17])۔

قدیم چینی معاشرے میں عورت کی حالت

کتاب "قصۃ الحضارۃ" کے مولف W. Durant ، قدیم چینی معاشرے میں عورت کے مقام کے حوالے سے لکھتے ہیں کہ^([18]): وہ اپنے شوہر کے تابع ہوتی، اس کی اطاعت و فرماں برداری میں اپنی عمر گزار دیتی، اپنے مالی اور معاشرتی تمام حقوق سے یکسر محروم تھی، وہ اس قدر معمولی تھی کہ اسے خود کے کسی بھی معاملے پر کوئی اختیار نہیں تھا بلکہ مرد ہی اس کے ہر معاملے کا نگران ہوتا، اسے ثقافت و تعلیم کا کوئی حق نہیں تھا بلکہ اس پر لازم تھا کہ گھر میں قید رہے، خدمت کرے، کام کاج کرے، سلائی اور خدمت کرنے کے مختلف وسائل سیکھے اور اس پر لازم تھا کہ 15 سال کی عمر کو پہنچے تو اپنے بال کاٹ دے اور جب 20 سال کی ہوجائے تو شادی کرلے اور اس کا والد دلال کی مدد سے اس کے لئے شوہر تلاش کرتا ، اس کی ولادت کو نحوست خیال کیا جاتا۔

‏ ایک اور مقام پر لکھتے ہیں کہ^([19]): باپ اپنی عبادتوں میں دعا ئیں کرتے کہ انہیں بیٹے دیے جائیں اور ماؤں کے لئے ذلت کے سخت ترین اور دائمی اسباب میں سے تھا کہ ان کی کوئی نرینہ اولاد نہ ہو، اس لئے کہ یہ بیٹیوں کی بنسبت کھیتوں میں کام کرنے کی زیادہ طاقت رکھتے ہیں اور میدان قتال میں ان سے زیادہ مضبوط ہوتے ہیں، اور بیٹیاں اپنے باپوں پر بوجھ تصور کی جاتیں اس لئے کہ ان کی سوچ تھی کہ وہ ان کی مارپیٹ کرکے، تربیت کرتے ہیں ، پھر انہیں ان کے شوہروں کے گھر بھیج دیتے ہیں (جس سے انہیں کوئی فائدہ نہیں ہوتا)۔

یہاں تک کہ بیٹیوں کو قتل کرنے کی عادات بھی موجود تھیں ،جب کسی خاندان میں ضرورت سے زیادہ بیٹیاں پیدا ہوجاتیں اور اس خاندان کےمالی معاملات مشکل ہونے کی بنا پر ان کے لئے ان کی کفالت کرنا مشکل ہوجاتا تو وہ انہیں کھیتوں میں چھوڑ دیتے تاکہ رات کی ٹھنڈ یا وحشی درندے اسے ختم کر دیں، اور قبیلے کے افراد کے ضمیر میں ذرا برابر خلش نہ ہوتی ۔

قدیم چینی کہاوت ہے کہ^([20]): اپنی بیوی کی باتوں کو خاموشی سے سنو لیکن اس کی تصدیق نہ کرو۔

قدیم رومن معاشرے میں عورت کی حالت

کتاب" قصۃ الحضارۃ" کے مؤلف لکھتے ہیں^([21]): بچی کی پیدائش ناپسندیدہ تھی، بلکہ معروف عادات کے مطابق باپ کو اجازت تھی کہ اگر اس کے گھر ناقص الخلقت بچہ یا بچی پیدا ہو تو اسے ماردے، اس کے برعکس انہیں شدید رغبت ہوتی تھی کہ ان کے ہاں نرینہ اولاد پیداہو ۔

رومن معاشرے میں عورت اس قدر مجبور تھی کہ اسے خود کےکسی معاملے پر کوئی اختیار نہیں تھا ،مرد جس طرح چاہتا اس کے ساتھ سلوک کرتا ،تمام اختیارات اور فیصلےاکیلے مرد کے ہاتھ میں تھے، اسے اس کے خاندان کے تمام افراد پر مکمل حقوق حاصل تھے، اس کے اختیارات میں سے یہ بھی تھا کہ کسی تہمت کی بنا پر اپنی بیویوں کو قتل کرنے کا حکم صادر کر سکتا تھا^([22])، اسے اپنی بہوؤں اور بیٹوں کی بہو ؤں پر بھی مکمل اختیار تھا کہ وہ جسے چاہے بیچ دے یا عذاب دے یا ملک بدر کردے یا قتل کردے،عورت کا کام محض یہی تھا کہ وہ سنے اور اطاعت کرے اور بجالے آئے ،اسے اعتراض اور مطالبہ کرنے کا کوئی حق نہیں تھا،وہ میراث سے محروم رکھی جاتی، کیونکہ میراث بڑے بیٹے کو دی جاتی، بلکہ معاملہ یہاں تک پہنچ چکا تھا کہ آدمی کے اختیارمیں تھا کہ خاندان میں کسی ایسے شخص کو داخل کردے جو خاندان میں سے نہ ہو اور اپنے بیٹوں میں سے جسے چاہے بیچ کر نکال دے^([23])۔

قدیم یونانی معاشرے میں عورت کی حالت

یونانی معاشرے میں عورت کا مقام سابقہ قوموں کے ہاں عورت کے مقام سے کچھ زیادہ بہتر نہیں تھا، مقام ذلت یہاں تک تھا کہ اسے عاریتا مانگ لیا جاتا ۔

ترویلونگ کہتا ہے^([24]):" زیادہ بچے جننے والی عورت اس کے شوہر سے عاریتا لی جاتی تا کہ وہ کسی اور مرد سے ملک کے لئے بچے پیدا کرے ،وہ ثقافت سے محروم تھی، اس درجہ تک حقیر تھی کہ اسے ناپاک اور شیطان کہا جاتا تھا^([25])، ایسا کوئی نظام نہیں تھا جو اس کی حفاظت کرتا ، وہ میراث سے محروم تھی، اسے خود کے مال میں تصرف کا کوئی اختیار نہیں تھا ،آزادی اور اظہار رائے سے وہ یکسر محروم تھی، مرد کی حکمرانی کے سامنے پوری زندگی جھکی ہوئی ،اسے طلاق کا مطالبہ کرنے کا بھی حق حاصل نہیں تھا بلکہ وہ مطلقا مرد کا حق تھا^([26])۔

بلکہ ان کے ہاں معاملہ یہاں تک پہنچ چکا تھا کہ ان کے بعض مفکرین نے مطالبہ کر ڈالا تھا کہ: ضروری ہے کہ لفظ عورت کوگھرمیں قید کیا جائے جس طرح عورت کے جسم کو گھر میں قید کیا تا ہے^([27])۔

یونانیوں کے ہاں عورت ایک انتہا درجے کی پستی میں گری پڑی مخلوق تھی۔

 کتاب" تمدن عرب " کے مؤلف لکھتے ہیں ^([28]):عموما قدیم یونانی لوگ عورت کو ایک حقیر چیز خیال کرتے جس کا نسل بڑھانے اور گھر کے کام کاج کے علاوہ کوئی فائدہ نہیں تھا، اگر عورت کسی بد شکل بچے کو جنم دیتی تو عورت کو ختم کر دیتے ۔

مشہور خطیب ادیب ڈموسٹن ^([29])نے عورت کی حالت کی یوم منظر کشی کی ہے کہ: ہم زانی عورتوں سے لذت کی خاطر تعلق رکھتے ہیں اور اپنی روزمرہ کی صحت کی خاطر عورتوں سے دوستیاں رکھتے ہیں اور شادی اس لئے کرتے ہیں کہ وہ ہمارے جائز بیٹے پیدا کریں۔

 جس معاشرے کے مہذب لوگ یہ باتیں کرتے ہو اس معاشرے میں عورت کا کیا مقام ہوگا؟

قدیم یہودی معاشرے میں عورت کی حالت

یہودیوں کے ہاں عورت گناہ کی جڑ اور اس کی بنیاد تھی، جس طرح تورات کی نصوص میں وارد ہوا ہے کہ^([30]) عورت خطا کی ابتدا ہے، اور اسی کے سبب سے سب گمراہ ہوگئے۔

چناچہ یہودی معاشرے میں عورت کی حالت بھی اچھی نہیں تھی ،ان کے قوانین نے عورت کے مقام کو انتہائی نیچے گرا دیا تھا، اور اس سے ڈرایا تھا۔

جیساکہ سفرالجامعہ میں ہے^([31]):

 25 میں نے اپنے دل کو متوجہ کیا کہ جانوں اور تفتیش کروں اور حکمت اور خرد کو دریافت کروں اور سمجھوں کہ بدی حماقت ہے اور حماقت دیوانگی ۔ 

26 تب میں نے موت سے تلخ تر اس عورت کو پایا جس کا دل پھندا اور جال ہے اور جس کے ہاتھ ہتھکڑیاں ہیں۔ جس سے خدا خوش ہے وہ اس سے بچ جائے گا لیکن گناہگار اس کا شکار ہوگا۔

باپ کو اپنے خاندان پر مطلق حکمرانی حاصل تھی ،بالخصوص عورتوں پر ،وہ جسے چاہتا اس کے ساتھ ان کا بیاہ کردیتا، اور جسے چاہتا اسے عورتیں ہبہ کردیتا، اسے اختیارحاصل تھا کہ اگر وہ انہیں بیچنا چاہے تو بیچ بھی سکتا ہے ، جیساکہ سفر الخروج اصحاح 21 میں فقرہ 7 سے فقرہ 11 تک وارد ہوا ہے ۔

کتاب قصۃ الحضارۃ کے مؤلف لکھتے ہیں^([32]): باپ کو خاندان کے تمام افراد پر مکمل اختیار حاصل تھا ،جیسے کوئی ختم نہیں کر سکتا تھا، چناچہ زمین اس کی ملکیت تھی، اور اس کے بیٹوں کوزندہ رہنے کا اختیار اسی صورت میں تھا جب وہ اس کے حکم کی اطاعت کریں ، باپ ہی حکومت تھا، اگر وہ غریب ہوتا تو اسے اختیار تھا کہ وہ اپنی بیٹی کو بلوغت سے پہلے بیچ دے تاکہ وہ کسی کی لونڈی بن جائے ، اسی طرح اسے مطلق حق حاصل تھا کہ وہ جس کے ساتھ چاہتا اس کے ساتھ اس کی شادی کرا دیتا ،اگرچہ بسااوقات وہ اپنے حق سے تنازل کرتا اور اس سے مطالبہ کرتا کہ وہ اس شادی پر راضی ہوجائے۔

جب یہودی عورت شادی کرتی تو اس کی ولایت اس کے باپ سے اس کے شوہر کی طرف منتقل ہوجاتی، اور وہ عورت اس مرد کی ملکیت بن جاتی جس طرح گھر ،غلام ،لونڈی اور دیگر مال اس کی ملکیت ہوتے۔ کیونکہ اسی پر تورات کے اوامر دلالت کرتے ہیں، جیساکہ سفر الخروج اصحاح 20 میں فقرہ 17 میں ہے۔

اس پر مستزاد یہ کہ یہودی شریعت نے بیٹی کو اپنے باپ کے ترکہ سے محروم کر دیا تھا، جب اس کے باپ کی نرینہ اولاد ہو جس طرح سفر عدد میں اصحاح 27 مئی فقرہ نمبر آٹھ میں ہے: اگر کوئی مرد مر جائے اور اس کا کوئی بیٹا نہ ہو تو تم اس کی ملکیت کو اس کی بیٹی کی طرف منتقل کر دو۔

اور ان کے ہاں بیوی اپنے شوہر کی وفات کے بعد خودبخود اپنے شوہر کے بھائی کی طرف منتقل ہوجاتی، چاہے وہ راضی ہو یا نہ ہو، الا یہ کہ وہ خود اس سے بری ہو جائے، جس طرح کتاب مقدس عہد قدیم میں آیا ہے^([33]):

اگر کئی بھائی مل کر ساتھ رہتے ہوں اور اُن میں سے ایک بے اولاد مر جائے ،تو اُس کی بیوی کسی اجنبی سے بیاہ نہ کرے، بلکہ اُس کے شوہر کا بھائی اس کے پاس جا کر اسے اپنی بیوی بنا لے، اور شوہر کے بھائی کا جو حق ہے وہ اس کے ساتھ ادا کرے ۔ 

جب عورت حائضہ ہو جاتی تو وہ نہ اس کے ساتھ کھاتے نہ پیتے اور نہ ہی اس کے ساتھ رات گزار تے، بلکہ اس سے علیحدگی اختیار کرتے یہاں تک کہ وہ پاک ہو جاتی ، اس معاملے میں ان کے قوانین کہتے ہیں^([34]): جس دن عورت کو محسوس ہو کہ اس کے ماہانہ ایام شروع ہو چکے ہیں، اسی دن سے وہ ناپاک ہو جاتی ہے، اگرچہ بظاہر کوئی نشان نہ بھی ہو، اور شوہر پر لازم ہے کہ وہ اسے نہ چھوئے، یہاں تک کہ اپنی چھوٹی انگلی سے بھی نہیں ،اور اسے اجازت نہیں کہ کی اپنی بیوی کو کوئی چیز پکڑا ئے، اگرچہ وہ چیز لمبی کیوں نہ ہو ، اور نہ ہی اس کے لئے جائز ہے کہ وہ اس سے کوئی چیز لے ،اور اپنے ہاتھ سے اس کی طرف کوئی چیز پھینکنا اور اس کے برعکس بھی جائز نہیں ،اور شوہر کو اجازت نہیں کہ وہ اپنی بیوی کے ساتھ ایک ہی دستر خوان پر کھائے، الا یہ کہ شوہر اور بیوی کے تھال کے درمیان کوئی رکاوٹ ہو، اور شوہر کو اجازت نہیں کہ اپنی بیوی کے بچے ہوئے پانی کےگلاس میں سے پیئے، اوردونوں کو ایک ہی چارپائی پر رات گزارنے کی بھی اجازت نہیں، اور نہ ہی ایک ہی بگھی میں سوار ہو نے کی اجازت ہے، اور نہ ہی ایک کشتی میں سوار ہونے کی، اور جب دونوں ایک ہی جگہ پر کام کر رہے ہوں تو ان کے لئے شرط ہے کہ ایک دوسرے نہ چھوئیں، اور اگر اس کا شوہر بیمار ہوجائے اور اس کے علاوہ اس کی خدمت کیلئے کوئی دوسرا نہ ہو تو اسے اجازت ہے کہ وہ اپنے شوہر کی خدمت کرے ،لیکن اس وقت تک جب تک وہ اس کو بغیر رکاوٹ کے چھوئے ،اور اگر عورت بیمار ہوجائے تو شوہر کو اجازت نہیں کہ وہ اس کی خدمت کرے، اگرچہ اسے نہ چھوئے، اور جب عورت بچہ پیدا کرتی ہے تو وہ ناپاک ہو جاتی ہے، اگروہ بچہ لڑکا ہے تو سات دن تک ناپاک رہتی ہے اور اگر لڑکی ہے تو چودہ دن تک ناپاک رہتی ہے، وہ بیٹے کی پیدائش کے چالیس دن بعد غسل کرے گی اور بیٹی پیدائش کے اسی دن بعد غسل کرے گی۔

قدیم مسیحی معاشرے میں عورت کی حالت

قرون وسطی میں کنیسہ کے پوپ نے عورت کے معاملے میں حد سے زیادہ مبالغہ کردیا تھا، وہ اس طرح کہ وہ لوگ عورت کو خطاء کی اصل ،گناہ کی جڑ اور پریشانیوں کا اصل سبب قرار دیتے جو تمام انسانیت کو پہنچا۔

اسی بنا پر مرد اور عورت کے درمیان تعلقات نجس ہو گئے جن سے بچنا واجب تھا ،اگرچہ وہ نکاح اور قانونی عقد کے ذریعے سے ہی کیوں نہ ہو۔

 ٹرٹلین کہتا ہے: عورت انسان کے نفس کی طرف شیطان کے داخل ہونے کا دروازہ ہے، اوراسی نےمرد کو لعنت کیئے ہوئے درخت کی طرف دھکیلا، وہ اللہ تعالی کے قوانین توڑنے والی ہے، اور اللہ کی صورت جو مرد کی شکل میں ہے اسے بگاڑنے والی ہے۔

ڈنمارکی کاتب Wieth Knudesen قرون وسطیٰ میں عورت کی حالت کی وضاحت کرتے ہوئے لکھتے ہیں کہ: کیتھولک مذہب کی رہنمائی کی وجہ سے عورت پر انتہائی محدود توجہ تھی جو عورت کو دوسرے درجے کی مخلوق شمار کرتا تھا^([35])۔

بولس رسول کہتا ہے :میں چاہتا ہوں کہ تم جان لو کہ ہر مرد کا سر مسیح ہے، اور عورت کا سر مرد ہے ، اور مسیح کا سر اللہ ہے، بلاشبہ مرد کے لئے لائق نہیں کہ وہ اپنے سر کو ڈھانپے کیونکہ وہ اللہ کی صورت اور اس کی بزرگی ہے ،جہاں تک عورت کا معاملہ ہے تو وہ مرد کی بزرگی ہے اس لئے کہ مرد عورت سے نہیں ہے بلکہ عورت مرد سے ہے، اور اس لئے بھی کے مرد عورت کے لئے نہیں پیدا کیا گیا بلکہ عورت مرد کے لئے پیدا کی گئی ہے ،اس لئے فرشتوں کی وجہ سے عورت کےسر پر حکمران ہونا چاہیے۔

مسیحی تعلیمات عورت کے اوپر لازم کرتی تھیں کہ وہ مرد کے سامنے جھکے اور اس کی اندھی اطاعت کرے، بولس کہتا ہے^([36]) : اے عورتو !تم اپنے مردوں کے لئے جھک جاؤ جس طرح رب کے لئے جھکتی ہو اس لئے کہ مرد عورت کا سر ہے ،جس طرح مسیح کنیسہ کا سر ہے۔

انگریز مصنف برناڈ شا کہتا ہے: جس لمحے عورت شادی کرتی ہے انگریزی قانون کے مطابق اس کی تمام تر ملکیت اس کے شوہر کی ملکیت بن جاتی ہے۔

 اس پر مستزاد یہ کہ یہ شادی ہمیشہ ہمیشہ رہتی ، جسے دین اور قانون مسلط کرتا ، چناچہ اگر زوجین کے درمیان نفرت اور بغض کتنا ہی بڑھ کیوں نہ جائے، مشاکل اور پریشانیاں کتنی ہی زیادہ کیوں نہ ہوجائیں لیکن طلاق نہیں ہو سکتی ،بلکہ وہ دونوں جسمانی طور پر علیحدگی اختیار کریں گے، جس کا ظاہری نتیجہ ہے کہ مرد اجنبی عورتوں کے ساتھ تعلقات قائم کرے گا اور چھپ کر دوستیاں کرے گا، اسی طرح عورت بھی اپنے لئے چھپ کر دوست بنائے گی۔

اسی طرح اگر میاں بیوی میں سے کسی ایک کی وفات ہو جاتی تو دوسرا جو زندہ ہوتا اسے دوبارہ شادی کی اجازت نہیں تھی ،جس کا نتیجہ یہ نکلاکہ عورت کا مقام گر گیا، اس کی اہمیت ختم ہوگئی، اور بالآخر نئے مغربی معاشرے میں اس کا برا ردعمل سامنے آیا کہ ان کے مفکرین اور مہذب لوگوں نے یہ مطالبہ کردیا کہ معاشرے کے تمام افراد میں سے ہر فرد، چاہے وہ مرد ہو یا عورت ،اسے مکمل حقوق اور مطلق آزادی دی جائے ،بغیر کسی قید کے، جس کا بدترین نتیجہ وہی نکلا جس میں آج کے یہ معاشرے رہ رہے ہیں کہ اخلاقی پستی ہے ،خاندان ٹوٹ پھوٹ کا شکار ہیں، یہ سب کنیسہ کے تشدد بے جا سختی اور ظالمانہ اور فطرت سے متصادم قوانین کا نتیجہ ہے۔

اسلام میں عورت کے حقوق

اسلام سے قبل انسانی معاشروں میں عورت کا جو مقام تھا اسے مختصرا بیان کرنے کے بعد ہمیں یہ دیکھنا پڑے گا کہ اسلام میں عورت کا کیا مقام ہے؟ اور وہ کون کون سے حقوق ہیں جو اسلام نے عورت کے لئے واجب قرار دیئے ہیں؟۔

 اسلام میں عورت کے عام وخاص ہر دو طرح کے حقوق ہیں ،اسلام میں عورت کے عام حقوق یہ ہیں:

1. شرعی احکامات کی تکلیف میں عورت مرد کی طرح ہے، جس طرح شریعت اسلامیہ نے مرد کو احکامات شرعیہ، جیسے نماز ،روزہ، حج اور زکاۃ کا مکلف ٹھہرایا ہے، جب اس میں مکلف ٹھہرائےجا نے کی شروط پائی جائیں جو کہ: اسلام ،بلوغت اور سمجھداری ہیں، اسی طرح عورت کو بھی مکلف ٹہرایا ہے ،ہاں یہ الگ بات ہے کہ شریعت نے بعض احکامات شرعیہ میں عورت کو خصوصی تخفیف دی ہے ، جیسے حالت حیض اورنفاس میں نماز اور روزہ معاف کردیا ہے ،اور جب وہ پاک ہو جائے تو روزوں کی قضا دے یہ محض حالت حیض و نفاس میں اس کی جسمانی اور نفسیاتی کیفیت کا خیال کیا گیا ہے۔
2. دنیاوی اور اخروی جزاوسزا میں عورت مرد کے برابر ہے اللہ تعالی کا فرمان ہے: ﴿مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ﴾ ^([37])۔

ترجمہ: جو شخص نیک عمل کرے مرد ہو یا عورت، لیکن باایمان ہو تو ہم یقیناً نہایت بہتر زندگی عطا فرمائیں گے اور ان کے نیک اعمال کا بہتر بدلہ بھی انھیں ضرور ضرور دیں گے۔

3. بحثیت انسان عورت مرد کے برابر ہے، وہ نہ تو گناہ کی جڑ ہے ، نہ آدم علیہ السلام کے جنت سے نکالے جانے کا سبب ہے، اور نہ ہی مرد سے کمتر جنس ہے، جیسا کے سابقہ ادیان کے مرد کہا کرتے تھے، اللہ تعالی کا فرمان ہے: ﴿يَاأَيُّهَا النَّاسُ اتَّقُوا رَبَّكُمُ الَّذِي خَلَقَكُمْ مِنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ إِنَّ اللَّهَ كَانَ عَلَيْكُمْ رَقِيبًا﴾^([38])۔

ترجمہ: اے لوگو! اپنے پروردگار سے ڈرو جس نے تمہیں ایک جان سے پیدا کیا اسی سے اس کی بیوی کو پیدا کر کے ان دونوں سے بہت سے مرد اور عورتیں پھیلا دیں اس اللہ سے ڈرو جس کے نام پر ایک دوسرے سے مانگتے ہو اور رشتے ناتے توڑنے سے بھی بچو بیشک اللہ تعالیٰ تم پر نگہبان ہے۔

ان آیات میں اللہ سبحانہ وتعالیٰ نے واضح کیا ہے کہ اس نے دونوں جنسوں ،مردوعورت دونوں کو ایک ہی مصدر سے پیدا کیا ہے، حمل ،پیدائش اور اہلیت میں دونوں کے درمیان کوئی فرق نہیں ،دونوں برابر ہیں۔

 اس طرح اسلام نے عورت کے متعلق ان کے پھیلے ہوئے ظالم قوانین کو ختم کردیا ، بالخصوص جو عورت کو مرد سے کمتر ثابت کرنے کے متعلق تھے ،جس بنا پر عورت کو بہت سارے انسانی حقوق سے محروم کیا جاتا تھا، رسول اللہ ﷺ کا فرمان ہے:" عورتیں مردوں کی مثل ہیں"^([39])۔

4. عزت، مقام و مرتبہ، اور وقار کی حفاظت میں عورت مرد کے برابر ہے ،اس پر تہمت لگانا اور اس کی عزت کے درپے ہونا سزا کا موجب ہے، اللہ تعالی کا فرمان ہے: ﴿وَالَّذِينَ يَرْمُونَ الْمُحْصَنَاتِ ثُمَّ لَمْ يَأْتُوا بِأَرْبَعَةِ شُهَدَاءَ فَاجْلِدُوهُمْ ثَمَانِينَ جَلْدَةً وَلَا تَقْبَلُوا لَهُمْ شَهَادَةً أَبَدًا وَأُولَئِكَ هُمُ الْفَاسِقُونَ﴾^([40]).

ترجمہ: جو لوگ پاکدامن عورتوں پر زنا کی تہمت لگائیں پھر چار گواہ نہ پیش کرسکیں تو انھیں اسی کوڑے لگاؤ اور کبھی بھی ان کی گواہی قبول نہ کرو، یہ فاسق لوگ ہیں ۔

5. میرا ث میں عورت مرد کی طرح ہے، اس کا بھی میراث میں حق ہے جس طرح مرد کا اس میں حق ہے ،اللہ تعالی کا فرمان ہے: ﴿لِلرِّجَالِ نَصِيبٌ مِمَّا تَرَكَ الْوَالِدَانِ وَالْأَقْرَبُونَ وَلِلنِّسَاءِ نَصِيبٌ مِمَّا تَرَكَ الْوَالِدَانِ وَالْأَقْرَبُونَ مِمَّا قَلَّ مِنْهُ أَوْ كَثُرَ نَصِيبًا مَفْرُوضًا﴾^([41])۔

ترجمہ: ماں باپ اور خویش و اقارب کے ترکہ میں مردوں کا حصہ بھی ہے اور عورتوں کا بھی (جو مال ماں باپ اور خویش و اقارب چھوڑ کر مریں) خواہ وہ مال کم ہو یا زیادہ (اس میں) حصہ مقرر کیا ہوا ہے ۔

جاہلیت میں عورت کو حق وراثت سے محروم رکھا جاتا تھا، اسلام نے اسے میراث کا حق دیا، بلکہ عورت خود دیگر سامان کی طرح مال وراثت تھی، اللہ تعالی کا فرمان ہے: ﴿يَاأَيُّهَا الَّذِينَ آمَنُوا لَا يَحِلُّ لَكُمْ أَنْ تَرِثُوا النِّسَاءَ كَرْهًا وَلَا تَعْضُلُوهُنَّ لِتَذْهَبُوا بِبَعْضِ مَا آتَيْتُمُوهُنَّ﴾⁽[42]⁾.

ترجمہ: ایمان والو! تمہیں حلال نہیں کہ زبردستی عورتوں کے ورثے میں لے بیٹھو انہیں اس لئے روک نہ رکھو کہ جو تم نے انہیں دے رکھا ہے اس میں سے کچھ لے لو۔

عمر بن خطاب رضی اللہ عنہ فرماتے ہیں: اللہ کی قسم ہم عہد جاہلیت میں عورتوں کو خاطر میں نہ لاتے تھے ، یہاں تک کہ اللہ تعالی نے ان کے حق میں جو نازل فرمانا تھا نازل فرمایا اور جوان کے لئے تقسیم کرنا تھا تقسیم کیا^([43])۔

6. کمال اہلیت اور مالی معاملات میں تصرف کی آزادی، جیسے ملکیت ،خریدوفروخت اور دیگر مالی تصرفات میں عورت مرد کے برابر ہے، اور اس کے تصرفات میں کوئی حد نہیں ، سوائے اسکے جس میں اس کا نقصان اور شریعت کی مخالفت ہو ،اللہ تعالی کا فرمان ہے: " ﴿يَاأَيُّهَا الَّذِينَ آمَنُوا أَنْفِقُوا مِنْ طَيِّبَاتِ مَا كَسَبْتُمْ﴾^([44])۔

ترجمہ: اے ایمان والو اپنی پاکیزہ کمائی میں سے خرچ کرو۔

اسی طرح اللہ تعالی کا فرمان ہے: ﴿إِنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ وَالْقَانِتِينَ وَالْقَانِتَاتِ وَالصَّادِقِينَ وَالصَّادِقَاتِ وَالصَّابِرِينَ وَالصَّابِرَاتِ وَالْخَاشِعِينَ وَالْخَاشِعَاتِ وَالْمُتَصَدِّقِينَ وَالْمُتَصَدِّقَاتِ وَالصَّائِمِينَ وَالصَّائِمَاتِ وَالْحَافِظِينَ فُرُوجَهُمْ وَالْحَافِظَاتِ وَالذَّاكِرِينَ اللَّهَ كَثِيرًا وَالذَّاكِرَاتِ أَعَدَّ اللَّهُ لَهُمْ مَغْفِرَةً وَأَجْرًا عَظِيمًا﴾^([45]).

ترجمہ: بیشک مسلمان مرد اور عورتیں مومن مرد اور مومن عورتیں فرماں برداری کرنے والے مرد اور فرماں بردار عورتیں اور راست باز مرد اور راست باز عورتیں صبر کرنے والے مرد اور صبر کرنے والی عورتیں، عاجزی کرنے والے مرد اور عاجزی کرنے والی عورتیں، خیرات کرنے والے مرد اور خیرات کرنے والی عورتیں، روزے رکھنے والے مرد اور روزے رکھنی والی عورتیں، اپنی شرم گاہ کی حفاظت کرنے والے مرد اور حفاظت کرنے والیاں، بکثرت اللہ کا ذکر کرنے والے اور ذکر کرنے والیاں (ان سب کے) لئے اللہ تعالیٰ نے (وسیع مغفرت) اور بڑا ثواب تیار کر رکھا ہے۔

7. اسلام نے عورت کی تکریم کو مکمل اور بہترین شخصیت کی علامت قراردیا ہے، رسول اللہ ﷐کا فرمان ہے: کامل ایمان والاوہ شخص ہے جو اخلاق میں اچھاہو اور تم میں سے بہترین وہ لوگ ہیں جواپنی عورتوں کے حق میں بہتر ہوں^([46]).
8. اسلام نے عورت کے لئے تعلیم وتعلم اسی طرح واجب قرار دیا ہے جس طرح مرد کے لئے واجب قرار دیا ہے، رسول اللہ ﷐کا فرمان ہے :علم کا حاصل کرنا ہر مسلمان پر فرض ہے^([47])

اور علماء کا اجماع ہے کہ لفظ مسلم میں مرد و عورت دونوں شامل ہیں۔

9. تربیت کے حق میں عورت مرد کے برابر ہے، دونوں میں سے ہر ایک کا حق ہے کہ ان کی اچھی تربیت اور نیکی پر نشونما کی جائے، بلکہ اسلام نے بیٹیوں کی تربیت اور ان پر خرچ کرنے کو جنت میں داخلے کا سبب قرار دیا ہے، رسول اللہ ﷐کا فرمان ہے: ”جس کے تین بیٹیاں ہوں اور وہ ان پر صبر کرے اور محنت و کوشش کر کے ان کو کھلائے پلائے اور انہیں پہنائے، تو وہ اس کے لئے روز قیامت آگ سے آڑ ثابت ہوں گی۔“^([48])
10. معاشرہ کی اصلاح، نیکی کا حکم دینے اور برائی سے روکنے میں عورت کی مسؤلیت مرد کے برابر ہے، اللہ تعالی کا فرمان ہے: ﴿وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِيَاءُ بَعْضٍ يَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَيُقِيمُونَ الصَّلَاةَ وَيُؤْتُونَ الزَّكَاةَ وَيُطِيعُونَ اللَّهَ وَرَسُولَهُ أُولَئِكَ سَيَرْحَمُهُمُ اللَّهُ إِنَّ اللَّهَ عَزِيزٌ حَكِيمٌ ﴾([49])۔

ترجمہ: ومن مرد و عورت آپس میں ایک دوسرے کے مددگار و معاون اور دوست ہیں وہ بھلائی کا حکم دیتے ہیں اور برائیوں سے روکتے ہیں نمازوں کی پابندی بجا لاتے ہیں زکوٰۃ ادا کرتے ہیں اللہ کی اور اس کے رسول کی بات مانتے ہیں یہی لوگ ہیں جن پر اللہ تعالیٰ بہت جلد رحم فرمائے گا بیشک اللہ غلبے والا حکمت والا ہے۔

11. کسی کو پناہ دینے میں عورت مرد کے برابر ہے، اللہ تعالی کا فرمان ہے : ﴿وَإِنْ أَحَدٌ مِنَ الْمُشْرِكِينَ اسْتَجَارَكَ فَأَجِرْهُ حَتَّى يَسْمَعَ كَلَامَ اللَّهِ ثُمَّ أَبْلِغْهُ مَأْمَنَهُ﴾^([50]).

ترجمہ: اگر مشرکوں میں سے کوئی تجھ سے پناہ طلب کرے تو اسے پناہ دے دو یہاں تک کہ وہ کلام اللہ سن لے پھر اسے اپنی جائے امن تک پہنچا دے۔

رسول اللہ ﷐کا فرمان ہے: مسلمانوں کا ذمہ ایک ہے ان میں سے ایک آدمی بھی یہ کر سکتا ہے، اورجس نے کسی مسلمان کے ذمہ کو توڑا، اس پر اللہ تعالیٰ، فرشتوں اور تمام لوگوں کی لعنت ہو، روزِقیامت اللہ تعالیٰ اس کی کوئی فرضی و نفلی عبادت کو قبول نہ کرے گا^([51])۔

اور یہ حق مردوعورت دونوں کے لئے یکساں ثابت ہے، ام ہانی بنت ابی طالب کہتی ہیں کہ میں فتح مکہ کے سال رسول اللہ ﷺ کے پاس آئی اور آپ ﷺ کو نہاتے پایا اور سیدہ فاطمہ رضی اللہ عنہا آپ ﷺ کی صاحبزادی ایک کپڑے سے آپ ﷺ کی آڑ کئے ہوئے تھیں۔ پھر میں نے سلام کیا۔ آپ ﷺ نے فرمایا: ”کون؟“ میں نے عرض کیا کہ ابوطالب کی بیٹی ام ھانی۔ آپ ﷺ نے فرمایا: ”خوش آمدید ام ہانی۔“ پھر نہا چکے تو کھڑے ہو کر آٹھ رکعت پڑھیں ایک کپڑے میں لپٹے ہوئے۔ پھر جب پڑھ چکے تو میں نے عرض کیا یا رسول اللہ! میری ماں کے بیٹے علی بن ابی طالب ایک آدمی کو مارے ڈالتے ہیں جس کو میں نے امان دی ہےوہ ہبیرہ کا بیٹا فلاں ہے۔ آپ ﷺ نے فرمایا:” جس کو تو نے امان دی اس کو ہم نے امان دی اے ام ہانی، سیدہ ام ہانی رضی اللہ عنہا نے کہا: یہ نماز چاشت تھی^([52])۔