كاپىر خوشنىنىڭ ھاجىتىنى ئادا قىلىش كېرەكمۇ؟
الإجابة:
بارلىق گۈزەل مەدھىيىلەر ئالەملەرنىڭ پەرۋەردىگارى بولغان ئاللاھغا خاستۇر.
بۇ ئىش سىز ياشاۋاتقان يۇرتنىڭ ئۆرپ-ئادىتىگە مۇناسىۋەتلىك بولۇپ، ئەگەر ئۇ يەردە خوشنىلار ئۆز-ئارا ھاجەتلىرىنى ئادا قىلىشىدىغان ئادەت بولسا، مىسالغا ئالساق: بىرسى بازارغا بارماقچى بولسا، خوشنىسى ئۇنىڭغا: ماڭا بازاردىن مۇنداق-مۇنداق نەرسە ئالغاچ كېلىڭ دەپ تەلەپ قىلسا، گەرچە خوشنىسى كاپىر بولغان تەقدىردىمۇ ئۇنىڭ دېگەنلىرىنى ئالغاچ كەلسە بولىدۇ. چۈنكى ئۇ خوشنىنى ھۆرمەتلەشنىڭ جۈملىسىدىندۇر.
پەيغەمبەر ئەلەيھىسسالام خوشنىدارچىلىق ھەققىدە مۇنداق دېگەن: «ئاللاھقا ۋە ئاخىرەت كۈنىگە ئىمان كەلتۈرگەن كىشى، خوشنىسىنى ھۆرمەت قىلسۇن. [بۇخارى رىۋايەت قىلغان ھەدىسنىڭ بىرقىسمى].
ئەمما مەزكۇر يۇرتنىڭ ئۆرپ-ئادىتىدە خوشنىلار ئۆز-ئارا ھەمكارلىشىدىغان ياكى ياردەملىشىدىغان ئىشلار بولمىسا، بۇ ۋاقىتتا ئىشنىڭ يۆلىنىشىگە قاراپ مۇئامىلە قىلىش كېرەك. پەزىلەتلىك شەيخ ئىبنى ئۇسەيمىين پەتىۋالىرىدىن ئىلىندى.
ئاللاھ ھەممىدىن ياخشى بىلگۈچىدۇر.
تەرجىمە قىلغۇچى: سەيپىددىن ئەبۇ ئابدۇلئەزىز